CEBU - Miduso na niadtong Lunes sa hapon ang anak ni Mayor Socrates Fernandez sa iyang motion for reconsideration kabahin sa kasong gipasaka batok kaniya sa mag-agaw'ng Winston ug Osbert Abellana.
Kahinumduman nga si Joavan gihatagan og 10 ka adlaw nga makasumiti sa mosyon human nga ang resolusyon sa kaso giduso ni Asst. Prosecutor Jennylyn Forrosuelo ngadto kang Talisay City Prosecutor Marcial Rubia niadtong Septiyembre 18, 2008.
Si Rubia sa pakighinabi sa mga tigbalita kagahapon sa udto nagkanayon nga usa sa mga highlights sa mosyon ni Joavan ang pasangil nga wala mopahigayon og preliminary investigation ang iyang buhatan ug gibasura usab ang mga ebidensiya nga gipresentar sa kampo niini.
Matud ni Rubia nga ang maong mosyon ihatag niya ngadto kang Forrosuelo nga maoy investigating prosecutor sa kaso aron ma-evaluate kini.
Ang pag-evaluate sa maong mosyon bisan walay tukmang panahon ang gitagal gipaningkamotan sa buhatan sa city prosecutor nga madali aron makagama dayon sila og desisyon niini. Kahinumduman nga si Joavan gipasakaan og kasong double illegal detention, double grave threat ug physical injuries sa mag-agaw'ng Abellana.
Apan ang physical injuries ug grave threat na-absorb na sa double illegal detention base sa imbestigasyon ni Forrosuelo sa kaso. – BANAT NEWS