Babaye, Drayber Na-Entrap Sa PASG-7

CEBU - Nasikop atol sa entrapment operation sa Presidential Anti-Smuggling Group (PASG-7) ang usa ka babaye ug drayber sa container van kagahapon sa ganghaan sa Cebu International Port human mosuborno bugti sa pagpagawas sa usa ka container van nga puno sa pinutol nga punoan sa lubi.

Ang mga dinakpan giila nga sila si Evangeline Vivar, 32, taga barangay Pahina Central ning dakbayan ug Laureto dela Serna, 50, taga Subangdaku, dakbayan sa Mandaue.

Si Noel Villamor, intelligence operative sa PASG-7 nga gikahinabi sa Banat News nagkanayon nga nakadawat sila og report nga adunay 20-footer container van nga puno sa pinutol nga punoan sa lubi gikan sa pier 7 nga dunggoanan sa Gothong Lines.

Mihimo sila og operasyon hinungdan nga ilang nababagan ang paggawas sa maong kargamento.

Si Villamor nagkanayon nga P12 mil ang gihatag nga suborno ni Vivar ngadto kaniya hinungdan nga ila kining gisikop.

Matud pa niini nga mga alas 2 pasado sa hapon kagahapon si dela Serna miduol kaniya diha sa iyang buhatan sa PASG-7 aron makig-negotiate kaniya nga mohatag kini og P20 mil bugti sa pag-release sa gibana-banang P8,000 board feet nga coco lumber nga mokabat sa P120 mil kun mahalin.

“Ako siyang giingnan si dela Serna nga ikaw gud, dayon nibiya kini sa iyang buhatan,” si Villamor nagkanayon.

Apan daling gitigum ni PASG-7 director Ariel Palcuto ang iyang mga sakop aron sa paglusad og entrapment operation batok sa drayber nga si dela Serna.

Sa alas 3:30 sa hapon, naabot si dela Serna kauban si Vivar ug samtang siya didto sa gawas nga nagpakaaron-ingnon nga nag-check sa sinakmit nga coco lumber, si Vivar midunol kaniya sa kuwarta nga P12 mil hinungdan nga iya kining gidakop.

Matud pa niini nga kasong corruption of public officials ang ilang ipasaka batok nilang Vivar ug dela Serna karong adlawa.

Sumala pa niini nga ang maong coco lumber gisakay kini sa Gothong Shipping Lines gikan sa Ozamis City ug na-intercept sa intelligence network sa PASG-7 hinungdan nga gi-hold kini diha sa CIP.

Si Palcuto nagkanayon nga gidili ang pag-transport og mga pinutol nga punoan sa lubi kun walay permit gikan sa Philippine Coconut Authority (PCA).

Silang Vivar ug dela Serna wala makapresentar og dokumento sa legalidad sa ilang pagbiyahe sa maong mga pinutol nga punoan sa lubi. – BANAT NEWS