CEBU - Sobra sa 10 ka pamilya sa Sitio Tigib, Barangay Lagtang, dakbayan sa Talisay ang pabakwiton gikan sa ilang gipuy-an aron paglikay sa disgrasya tungod sa posibleng pagdahili na usab sa yuta tungod sa kusog nga uwan.
Usa sa mga residente sa lugar nga si Lolita Tancinco, 40, kinsa adunay upat ka anak sa pakighinabi niini sa Banat News nagkanayon nga siyam ka tuig na sila nga nagpuyo sa lugar ug ang duha ka sunod-sunod nga hitabong pagdahili sa yuta diha sa ilang lugar unang higayon nga nahitabo sa ilang lugar.
Kahinumduman nga sa milabay’ng semana midahili ang yuta sa lugar ug usa ka balay ang nadakdakan og dakong bato nga nadala sa pagdahili sa yuta.
Sa milabay’ng buwan, usa ka inahan nga nagpasuso sa iyang anak namatay sa dihang ang ilang balay nadat-ogan og dakong bato nga nadala sa pagdahili sa yuta apan swerte nga ang bata nadat-ugan sa inahan niini.
Si Tancinco nagkanayon nga gibati usab sila og kabalaka ug gani wala sila makatulog sa dihang mibusdak ang kusog nga uwan dala sa bagyong Pablo sa milabay’ng adlaw.
Matud niini kun adunay laing lugar nga ilang kabalhinan mobakwit sila gikan sa ilang gipuy-an karon.
Ang mga opisyal sa Dakbayan sa Talisay ug sa Barangay Lagtang misusi na sa lugar ug miawhag sa mga residente nga mobiya na gikan sa ilang gipuy-an aron malikayan ang disgrasya.
Si Tancinco midugang nga ang city social welfare mipasalig nga hatagan sila og mga hinabang.
Usa sa mga opisyal sa Lagtang nga si Osias Quilong-quilong ang mibisita sa lugar ug miawhag sa mga residente nga kanunay’ng magmabinantayon ilabi sa panahon nga mobunok ang kusog nga uwan.
Matud niini nga karong adlawa mapupos na ang tagal nga gihatag ngadto sa mga residente nga mobiya gikan sa ilang lugar ug human niini maggama na sila og order sa pagpabakwit sa nahisgutang mga residente ug ang maong order iduso unya nila sa konseho sa dakbayan.
Kahinumduman nga sa sunod-sunod nga insidente si Dr. Lino Alanzado, city health officer sa dakbayan ug hepe sa Talisay Response Emergency Action Team (TREAT) mihatag og 10 ka adlaw nga tagal sa pagpabakwit sa mga residente gikan sa ilang mga gipuy-an.
Apan usa sa mga problema sa mga residente ang ilang kabalhinan ug ang gipangayo nilang hazard pay gikan sa kagamhanan sa pagguba sa ilang mga balay. – BANAT NEWS