Hubog lumos patay

CEBU - Nalumos patay ang usa ka mananagat nga gituohang hubog nga naligo sa dagat didto sa Sitio Canooy, barangay Binlod, lungsod sa Argao sa miaging hapon.

Ang biktima mao si Renato Tolda, 36, ulitawo ug lumad nga taga Tapilon, Daanbantayan apan naminyo didto sa Binlod, Argao.

Matud ni PO1 Eddie Semilla sa Argao Police Station nga nahinabi sa Banat News nga nag-inom ang biktima kauban sa mga paryente ug barkada niini didto sa baybayon sa Canooy samtang nangaligo sa dagat.

Apan nagpabilin ang biktima ug wala mokuyog sa pagpamauli sa mga kauban niini kay motiwas pa kuno siyag kaligo.

Busa nianang pagka-alas 7:00 na sa gabii, nakahukom ang mga paryente niini nga susihon ang biktima kay wala man gyud mahiuli sa ilang balay.

Gipangita nila ang biktima sa tibuok gabii apan wala gyud nila kini igkita didto sa baybayon sa Canooy.

 Apan kagahapon sa alas 6:00 sa buntag nakit-an kini nga patay na ilawom sa dagat nga naggakos gihapon sa dakong bato.

Ang municipal health officer sa Argao mikonpirmar nga pagkalumos gyud ang namatyan sa biktima ug walay foul play ang kamatayon niini. – BANAT NEWS