Samarang sundalo sa encounter sa Negros gihataga'g medalya

CEBU - Sundawong samaran sa engkuwentro sa Manlokahoc, Sipalay City Negros Occidental sa miaging semana gihatagan og award ni Lt. General Pedro Ike Inserto commanding general sa Central Command kagahapon sa hapon.

Si Pfc. Recto Moboayaen Jr. 23, taga barangay Pandakan lungsod sa Pinamungahan ug sakop sa 61st IB gitauran ni Inserto og Military Medal of Merit ug Wounded Personnel Award diha sa tambalanan sa Vicente Sotto Memorial Medical Center.

Si Moboayaen gikatakdang ipaubos sa operasyon tungod kay ang bala giingong nag-ungot pa sa iyang lawas ug di kini mahimo sulod sa Lapu-Lapu Military Hospital diha sa Centcom.

Kini maoy ikaduhang higayon nga mitaod og medalya si Inserto sa samarong mga sakop sukad nga milingkod isip commander sa Central Command.

“ Pangalawa na ito, although I visited yung CAFGU na wounded namin from Samar nasa V. Luna Hospital ngayon although I did not award a medal… I gave him some cash para may panggastos sila sa Manila, kase nagbabantay sa kanya ang anak n’ya eh,” pagbutyag pang Inserto.

Mipasalig si Inserto nga sagubangon sa Central Command ang tanang bayranan ni Moboayaen apan mipalakbit usab sa militanteng pundok sa pagdonar og tabang sa maong sundalo.

“Perhaps Karapatan could donate some money for a wounded soldier, because they are supposedly and independent human rights group so, but if not, they will take care of our soldier,” hagit pang Inserto.

Niini, hangyuon ni Inserto ang mga doctor human unya sa operasyon nga adto nalang si Moboayaen magpaalim sa iyang operasyon sa ospital sa Central Command.

Ang 61st IB gipangulohan ni Lt. Mc Gary Dida diin masakop si Moboayaen maoy nakaengkuwentro sa kapin sa 20 ka mga gituuhang rebeldeng New Peoples Army sa nahisgutang lugar nga miresulta sa pagkadakop sa tulo ka mga batan-ong amasona.

Si Moboayaen nga nahinabi sa mga tigbalita niingon dako iyang pagtuo nga sniper sa NPA nga usa mga amasonang nakaigo niya tungod kay niadtong higayona.

Ang tropa kasamtangang nihimo og combat operation sa lugar dihang ilang nasugatan ang maong grupo nga gituuhang gipanguluhan sa usa ka Kumander Ampol ug giisip niyang maoy labing grabeng engkwentrong iyang nasugatan sukad nga nasulod siya sa Army upat na ka tuig ang nakalabay.

Gihatagan usab ni Inserto ang ginikanan sa sundalo og cash aron ilang magamit sa galastuhan sa ospital.

Ang amahan niini nga si Recto Moboayaen Sr. usa usab ka retiradong sundawo nanghinaot nga makaretiro sama niya ang iyang anak, sumala pa niya nadawat dayon niya ang gidangatan sa anak tungod kay nasayod siya sa risgo sa maong trabaho. – BANAT NEWS