Pag-roll back sa minimum fare gisugat og mga pagsupak sa drivers

CEBU - Gisugat og pagsaway sa mga nagkadaiyang transport groups ang petisyon ni Atty. Manuel Iway nga paus-usan ang minimum nga pletihan sa jeepney ingon man tangtangon ang P10 add-on sa mga taxi sa rehiyon.

Ang public hearing diha sa buhatan ni Romulo Bernardes sa LTFRB-7 gitambungan di lang sa mga transport groups kundili lakip na sa mga tinun-ang maoy nag-unang mga pasahero sa mga jeepney.

Sa petisyon ni Iway padayon niining gibarugan nga wala nay rason aron di mopaus-os og pletihan ang mga transport groups gumikan kay barato na ang presyo sa petrolyo matag barrel sa world market.

Pinaagi sa mga placards ug sa mismong pamahayag sa mga representante sa nagkadaiyang transport groups lakip na niini ang Metro Cebu Taxi Operators Association, Nagkahiusang Drayber sa Sugbu, Citrasco, Vudtrasco ug uban pa nga mipadayag usab sa ilang pagsupak.

Si Ruben Rama sa Nadsu nagkanayon nga di makiangayong kunhuran pa ang minimum nga pletihan gumikan kay di consistent ang pag-us-os sa presyo sa petrolyo sa kalibutanong merkado.

Dugang pa niini mao ang wala pagpaubos sa presyo sa mga piyesa karon ug ingon man sa mga palaliton.

Matud pa sa Nadsu nga kaniadto pa wala sila mamugos pagpatuman sa kung unsay nasabutan sa Land Transportation Franchising and Regulatory Board kumparar sa ubang mga silingang rehiyon.

“Ang bag-ong panawagan nga nagpaubos og P2 sa minimum nga pletihan, usa ka malisyoso nga demanda nga nanukad lamang sa personal nga kagustuhan ug wala magbase sa kongkretong kahimtang ug sukaranan,” sumala pa sa pamahayag sa Nadsu.

Gawas nga di motugot ang Nadsu sa pagbalik ngadto sa P6 nga minimum fare, buot pa nilang padugangan pa og P.50 ang kasamtangang P8 nga pletihan karon subay sa kamandoan sa LTFRB-Manila.

Samtang ang MCTOA sa ilang bahin nagkanayon nga di pa usab panahon karon aron tangtangon ang P10 nga add-on sa taxi tungod sa susama gihapong pipila ka rason sa ubang transport sector.

Matud pa ni Iway angayang tangtangon na ang P10 nga add-on sa mga taxi gumikan kay wala kini konsultasyon gikan sa mga taga Rehiyon-7 ug gisunod lang dayon ang kamandoan gikan sa Manila.

Sumala pa niya nga wala masayod ang LTFRB-Manila nga kadaghanan sa taxi karon dinhi sa Rehiyon -7 nigamit na og liquefied petroleum gas (LPG) nga mas barato kaniadto pa ug mas nibarato pa karon. – BANAT NEWS