CEBU - Gidakop, gipapriso ug pasakaan pa gyud og kaso sa iyang bana ug mga anak ang usa ka 51-anyos nga ginang human giingong nasakpan sa akto nga nakighilawas sa laing lalaki nga gituuhang iyang karelasyon niadtong Domingo sa gabii diha sa usa sa mga barangay sa Consolacion.
Gidakop usab ang 44-anyos nga karelasyon sa suspek nga usa ka biyudo (mga ngalan sa duha gipugngan sa Banat News).
Matud pa sa kapolisan ang mismong bana nga usa ka construction worker maoy nangunay sa pagpadakop sa duha tungod sa malaw-ay'ng buhat sa asawa niini ug ilang biyudong silingan.
Si PO3 Joerahmie Espinosa sa Consolacion Police dihang nabinabi sa Banat News nagkanayon sa sayo pa nianang adlawa gikatahong nag-away ang magtiayon may labot sa pagpangabit sa babaye, apan imbes mangayo og pasaylo gikatahong gisuwayan pa hinuon og dunggab sa asawa ang reklamante.
Tungod sa kapungot nilakaw ang reklamante ug nisumbong sa kapolisan diin iyang gisaysay nga walo na ka bulang dunay relasyon ang duha ug ang mismong iyang asawa maoy mosulong sa balay sa maong biyudo.
Ang kapolisan mitambag sa reklamante nga mopauli ug kung masakpan niining miadto na usab sa balay sa lalaki ang asawa ipahibalo kini dayon ngadto kanila aron sila nay mosikop sa duha.
Apan nianang dayun nang alas 9:00 sa pag-uli sa bana wala na diha ang iyang asawa ug nasayran nalang niya nga tua na sad kini sa balay sa maong lalaki ug namalong na og suga.
Tungod niini misumbong pag-usab ang bana sa kapolisan ug ning higayuna gituktok ug gipugos og abli sa kapolisan ang pultahan sa balay sa biyudo.
Matud ni PO3 Espinosa nakit-an gyud nila ang duha nga naghubo pa sa ilang mga sapot ug underwear ug ang babaye nagkara-karang misul-ob og sinina hinungdan nga gidakop ang duha. Ang reklamante uban sa tulo niya ka mga anak mipadayag nga ila gyung kasuhan ang duha.
Dugang nahipos nga kasayuran sa kapulisan gikan sa mga silingan nga dugay na silang nakahibawo sa tinago-tago nga relasyon sa duha ilabina kun motrabaho ang bana sa construction site sa siyudad sa Talisay. – BANAT NEWS