'Misuborno' ni Ylanan arestado

CEBU – Usa ka PUJ driver ang giposasan sa hepe sa Criminal Investigation and Intelligence Branch (CIIB) nga si Sr. Insp. George Ylanan human kini gikatahong misuway og suborno og P200   sa opisyal human niya kini dakpa tungod sa traffic violation.

Ang pagdakop nahitabo alas 12 pasado sa gabii niadtong Domingo diha sa may dalan B. Rodriguez ug V. Rama ning dakbayan human gikatahong wala manumbaling sa traffic signal.

Ang gipasakaan og kasong corruption of public official kagahapong adlawa giila nga si Eduardo Villanueva, 28, driver sa PUJ nga may rotang 11A lumad nga taga Mantalungon lungsod sa Dalaguete ug kasamtangang nanimuyo diha sa dakbayan sa Talisay.

Si Ylanan nga gikahinabi sa mga tigbalita nagkanayon padulong na siyang mopauli sa ilang panimalay dihang si Villanueva wala manumbaling sa stop signal sa eskina B. Rodriguez ug V. Rama ug nipaturatoy og padagan.

Hinungdan nga siya ug ubang mga motorista daling nakalubag sa ilang mga sakyanan aron sa pagpadaplin apan ang akusado nilahos gyud og sutoy.

Tungod niini gigukod ni Ylanan ang jeepney ug dihang nababagan mipaila si Ylanan nga polis ug mimando sa pagtunol sa iyang lisensya apan gikatahong imbes lisensya kwartang P200 ang gitunol sa suspek kaniya.

Tungod niini giposasan ni Ylanan ang kamot sa suspek. Ang akusado nga gikahinabi sa mga tigbalita nagkanayon nga ikaduha na niyang higayon nga nadakpan ug pulos nanawat ang mga enforcers nga makasakop niya.

Matud niya nga nagdali siya niadtong higayuna gumikan kay mag-ilis pa siya sa iyang mga sapot diha sa Banawa barangay Guadalupe.  – BANAT NEWS