CEBU – Usa ka 38-anyos nga kinadenahang babayeng giingong may deperensya sa pangisip ang naa karon sa talandugong kahimtang human makaangkon og daghang paso sa tibuok kalawasan dihang miigo ang sunog sa ilang pinuy-anan pasado alas 11 sa udto kagahapon sa buntag diha sa Luray-I siyudad sa Toledo.
Ang biktima nakaangkon og 3rd degree burns kay wala dayon kini makagawas gikan sa balay tungod sa kadenang nagpugong kaniya samtang ang ilang balay gilamoy sa kalayo.
Ang biktima giilang si Chona Apurado, 38 anyos, dalaga kinsa giingong dugay nang may deperensya sa pangisip ug gikadenahan aron di na makagawas sa ilang balay nga maglaroy-laroy.
Matud ni PO1 Celso Makidatu sa Toledo City Police dihang nahinabi sa Banat News subay sa report sa Toledo City Bureau of Fire Protection nga ang nasunog mao ang pinuy-anan sa magtiayong Donatila Apurado, 70 anyos ug bana niining retiradong polis nga si Rai Apurado nga dugay nang namatay.
Gikatahong ang biktima ug iyang inahan nalang maoy nagpuyo sa maong balay gumikan kay pulos nang nangaminyo ang ubang mga anak ni Donatila.
Sa imbestigasyon sa kabomberohan sa siyudad sa Toledo naglung-ag og paniudto si Donatila niadtong tungura ug gibiyaan niya kini aron sa pagpalit og sud-an.
Ang mga silingan ug kaparyentehan nalang nila maoy nakabantay pag-ulbo sa kalayo gikan sa pinuy-anan sa pamilyang Apurado.
Ang biktima gikatahong diha pa sa sulod ug nagpunay og siyagit ug paghilak apan wala makagawas gumikan sa kadenang nagpugong kaniya hinungdan nga gidali nila kini og sulod ug giluwas.
Matud ni PO1 Makidatu napagawas ang biktima apan naputos sa paso ang kalawasan niini ug gidali pagdala sa Toledo City Hospital ug girekomendar nga ipabalhin dayun sa tambalanan dinhi sa siyudad sa Sugbo tungod sa seryusong kahimtang.
Gibana-banang niabot lang og P15 mil ang kinatibuk-ang danyos sa pinuy-anan sa pamilyang Apurado nga naugdaw nga ginama lang sa mga light materials ug padayon pa usab ang imbestigasyon sa kabomberohan sa maong hitabo.
Ang maong sunog gipaubos lang sa 1st alarm ug hingpit gyud nga naugdaw ang tibuok balay sulod sa 10 ngadto sa 15 minutos tungod kay sagad sa mga dapat niini mga kahoy lang. – BANAT NEWS