Snatcher tiklo

CEBU - Gidimalas ang usa ka minor de edad nga snatcher dihang human siya makapanglabni og kuwentas sa dalan Colon kagahapon sa udto, mikaratel siyag dagan, apan imbis mosibat, nasugatan na hinuon niya ang mga polis nga nag-roving busa posas maoy iyang gidangatan.

Ang gibalhog dayon sa prisohan sa Waterfront Police Station mao si Rey (dili tinuod niyang ngalan) 17, taga Magsaysay St., Suba-Pasil ning dakbayan.

Ang maong batan-on nadakpan human niya labniha ang kuwentas ni Rosaly Salonoy, 26, taga barangay Manjo, lungsod sa Inupakan probinsya sa Leyte.

Matud pa ni SPO3 Ernesto Caballero sa WPS nga gikahinabi sa Banat News nga ang batan-ong snatcher nadakpan nila ni PO1 Jodan Batucan ug PO1 Jose Randell Buscato mga sakop sa miscellaneous team.

Kini samtang nagroving ang duha ka mga police sa maong lugar dihang   naaktohan nila ang pagpanglabni sa maong batan-on ngadto ni   Salonoy.

Busa nakuha pagbalik sa biktima ang iyang kwentas nga mokantidad og P6 mil ka pesos.

Kasong pagpangawat ang gihikay na sa kapulisan batok sa maong minor de edad kinsa gikatakda usab nga iduso ngadto sa buhatan sa Department of Social Welfare and Development (DSWD). – BANAT NEWS