Polis misusi sa pinusilay sa Tierra

CEBU - Ang kapolisan sa dakbayan sa Talisay padayong miimbistigar sa motibo sa nahitabong pinusilay niadtong Huwebes sa gabii didto sa Tierra Grande, Phase I, Camella Homes, Barangay Lawaan I ,sa nahisgutang siyudad.

Si Senior Inspector Jovito Canlapan, officer in charge sa Talisay City Police Station mibutyag sa Banat News kagahapon sa buntag nga usa sa ilang gitutokan karon sa kapolisan mao ang kabahin sa impormasyon nga matud pa daghang nangasuko  kang Reynaldo Bantilan alyas “Abdul Faisal” ang guwardiya sa Camella Homes nga maoy biktima niadtong higayona.

Kahinumdoman nga si Bantilan, namatay sa maong engkwentro apan nakabawos kini ug napatay usab niya ang usa sa mga suspetsado nga si Armando Horandoy ug kritikal ang kondisyon sa laing suspetsado nga si Wilmer Alcontin.

 Si Alcontin sa sayo pa napusilan ni PO2 Marciano Parayday isip bawos sa polis kinsa maoy unang gipusil ni Alcontin.

 Matud ni Canlapan nga ang presidente sa home owners association sa Camella Homes mibutyag kanila nga ang mga adis-adis sa maong lugar ug ang mga drayber sa habal-habal pulos nagdumot kang Bantilan.

Kini tungod sa kahigpit sa naulahi sa pagbantay batok sa mga adis-adis ug sa mga drayber sa habalhabal nga walay sticker. (BANAT NEWS)