Bodega nasunog
CEBU - Mokabat sa P250,000 ang danyos sa nasunog nga bodega nga nahimutang sa Upper Tingob, dakbayan sa Mandaue alas 11:32 sa miaging Biyernes sa gabii.
Si FO3 Cefriano Codilla, imbestigador sa kabomberohan sa maong dakbayan mibutyag nga ang nasunog mao ang Cebu Agri Cane Trade Inc. nga nag-stock og mga alcohol ug uban pang mga produkto sa grocery.
Matud pa ni FO3 Codilla nga nagsugod ang kayo sa tunga-tungang bahin sa maong bodega dihang kalit lang misilaob ang mga linya sa kuryente niini.
Dugang pa niya nga gipaubos sa 3rd alarm ni Chief Inspector Oscar Mayol ang maong sunog ug milungtad og 18 minutos ang gidugayon sa ilang binugnoay niini hangtod nga napawong.
Si Jomar Dayoha nga maoy guard on duty sa maong bodega dihang gisukit nila ni Codilla nagkanayon nga mikalit lang og silaob ang mga linya sa kuryente sa maong bodega.
Si Codilla nagtuo nga faulty electrical wiring ang hinungdan sa maong sunog ug maayo nalang kay walay naangol o kinabuhing nakalas. (BANAT NEWS)
- Latest
- Trending
