CEBU - Hugtanong gipanghimakak ni Dr. Elmer Repalda, tigpamaba sa Mandaue City College (MCC) nga matak-opan ang maong tulunghaan nga nahimutang sa Eversely Child Sanitarium Hospital sa barangay Jagobiao.
Kini ang gipadayag ni Dr. Elmer Repalda isip reaksiyon sa gikataho nga pagpatak-op sa ilang tulunghaan nga gidumala ni Dr. Paulus Cañete base sa pagbuot sa Commission on Higher Education (CHED).
Gitataw ni Repalda nga supervisory lamang ang kaakohan sa maong ahensiya sa kagamhanan apan wala kini gahom sa pagpatak-op sa ilang tulunghaan.
Si Repalda miingon nga daghang mga kaso nga ilang gisang-at ngadto sa korte ug ingon man sa Ombudsman Visayas batok kang Mayor Jonas Cortes ug ilang gipaabot ang pagresolbar niini.
Dugang pa niya nga ang kaakohan sa CHED sa maong tulunghaan mao ang pagsugyot og dugang ikalambo sa kahimtang niini ug dili kay sa pagpatak-op.
Gipasabot ni Repalda nga natukod ang maong tulunghaan base sa giaprobahan nga ordinansa diin nagtangkil kini og mga kaakohan alang sa paggahin og salapi alang sa pagpadagan sa maong tulunghaan.
Sa nasayran nga gipadayag ni Mayor Cortes atol sa 888 Forum ang bahin sa lakang sa pagpatak-op sa MCC nga gidumala ni Cañete.
Apan matud pa ni Repalda nga pulos lamang pagarpar kining kang Cortes.