CEBU - Gipalig-on sa kapolisan sa lungsod sa Consolacion ang ilang monitoring sa kabarangayan batok sa mga kalihokan sa mga pundok nga nakigbatok sa gobyerno sama sa New People’s Army (NPA).
Kini ang nasayran sa Banat News kang Inspector Leoncio Baliguat, hepe sa kapolisan sa maong lungsod nga nahinabi kagahapon.
Usa sa kaabag sa kapolisan sa pagpaniid sa palibot sa lungsod mao ang mga sakop sa Barangay Intelligence Network (BIN) sa 21 ka barangay sa maong lugar.
Gihimo kini sa kapolisan sa maong lungsod human usab sa nahitabo sa anak ni kanhi Konsehal Elenito Palang nga napatay sa kasundalohan didto sa Negros Oriental.
Gipadayag ni Inspector Baliguat nga base sa ilang mga monitoring sa kabarangayan sukad pa kaniadto, wala sila makamatikod nga may mga NPA sa mga barangay sa maong lungsod.
Si Baliguat wala usab mosalikway sa posibilidad nga dunay mga lumolupyo sa maong dapit nga nakabig sa pag-apil sa mga kalihokan sa maong grupo apan dili lang aktibo sa pagpasiugda og mga kalihokan sa maong dapit.
Hinuon si Board Member Victor Maambong sa iyang resulosyon nag-awhag sa Commission on Human Rights (CHR) sa paghimo og pakisusi sa maong hitabo alang sa pagpalutaw sa kamatuoran. Romeo T. Limpangog (BANAT)