Cemvedco mopatukod sa Unit 2 bldg. sa Carbon

CEBU - Subling moduso og project proposal ang Cebu Market Vendors Development Cooperative (Cemvedco) alang sa tinguha niining pagtukod o  pagpabarog og balik sa Unit 2 sa Carbon Public Market.

Ang Cemvedco andam mogasto og P200 milyones alang sa bag-ong building nga mosulod og kapin sa 300 ka mga stalls.

Matud sa presidente sa Cemvedco nga si Erwin Goc-ong nga posibling maduso ang ilang proposal ngadto sa City government karong sunod buwan.

“Naa mi karon sa proseso sa pag-andam og bag-ong proposal, maghimo pa ta og detailed plan, unya atong suportahan og economic feasibility study,” sumala ni Goc-ong.

Una nang gipadayag ni Mayor Tomas Osmeña nga siya bukas alang sa proposal sa Cemvedco apan kini giingong mag-agi una sa City Market Authority.

Ang Market Authority na maoy motoon sa proposal ug kung walay babag niini niingon si Osmeña nga mahimong ipadayon ang katukuran sa bag-ong Unit 2 building.

“I have no objection to that but we have to pass it to the Market Authority for the study if it can be done why not,” nagkanayon si Osmeña.

Kahinumduman nga ang nahisgutang Unit sa Carbon Public Market nasunog pipila ka tuig na ang nakalabay apan wala pa mapabarog og balik sa City government.

Kini ang hinungdan nga nakahuna-huna ang Cemvedco nga mao na ang mangita og pundo alang sa building.

 “Ang among kolektahon mao lang ang rental sa stalls aron makabawi mi sa gasto unya ila na sa siyudad ang tanan, sama sa business permit, landing fees, entrance fees ug uban pa nga mga regulatory fees,” matud ni Goc-ong.

Nasayran sa Banat News nga gihangop sa Market Authority ang lakang sa Cemvedco ug gani gusto niining ipaapil sa maong kooperatiba ang pagtukod og bag-ong building diha sa Warwick Barracks. (BANAT)