Nalunod nga barge palutawon

CEBU - Gisugdan na ang operasyon sa pagpalutaw og balik sa LCT Gwen Vida nga natikyaob sa tunga-tungang bahin sa Mactan Channel duol sa Ouano wharf nga nagkarga og mga balas ug graba duha ka semana na ang nakalabay.

Matud pa ni Philippine Coast Guard Central Visayas District Operations Commander Antonio Cuasito gitugotan na sa Jomalia Shipping Inc., tag-iya sa maong barge, ang kompaniya sa Omega Steel and Marine Services nga maoy mopalutaw niini.

Magdepende sa kahimtang sa panahon ang pagpalutaw sa barge sud sa duha ka semana ug kung adunay mga kakulian sama sa kahimtang sa panahon, kusog nga balod, panglawas sa mga nagtrabaho ug ang pagpalyar sa ilang mga kahimanan posibleng abton kini og usa ka bulan.

Kagahapon gisugdan na nila ang unang hugna pagpalutaw sa  maong barge  diin  ilang  gibuslutan ang  kilid  sa  ballast  tank  aron  susihon ang gidaghanon sa tubig nga nakasulod.

Lakip sa prosesong himuon susihon ang manhole kung  wala  bay  miliki  nga  gasket,  pagbutang og  tubo alang sa pagsuyop sa tubig sud sa matag compartment sa ballast tank, pagpabarog o pagpalutaw niini balik sa orihinal nga posisyon, dayon haw-as ang tubig, ug kun molutaw na og balik guyuron kini ngadto sa usa ka shipyard.

Kahinumduman nga karong adlawa maoy ika-duhang semana sa pagkatikyaob sa maong barge human kini makasugat og dakong balod niadtong Sept. 11, 2008 diin 13 ka mga tripulante lakip na ang kapitan ang naluwas sa maong trahedya. – BANAT NEWS