CEBU - Giawhag sa pangulo sa Police Regional Office (PRO-7) Chief Supt. Ronald Roderos ang mga ginikanan sa pag-monitor sa ilang mga anak nga niapil og mga kalihukan sa tunghaan.
Sa gihimong Talakayan sa Isyung Police (TSIP) kagahapong adlawa diha sa Club Ultima si Roderos nagkanayon nga susihon gyud sa mga ginikanan ang ilang mga anak aron di masakop sa mga militanteng pundok.
Kini may labot sa nahitabo sa nursing board passer nga Cebuanang si Rachelle Mae Palang human sa engkwentro sa militar ug NPA sa bukirong bahin sa Dauin, Negros Oriental.
Matud pang Roderos ang rebeldeng komunistang NPA sagad mokuha og recruits diha sa mga tunghaan aron maoy gamitong lawog ngadto sa gobiyerno tungod kay tungod sa kabatan-on dali silang madani sa mga propaganda sa pundok.Kumparar sa mass supporters sa kabarangayan, mas maalamon ang mga tinun-ang recruits maong mao kini sagad nga kuhaon sa grupo isip miyembro.
Sa iyang bahin sa Lt. Col. Oscar Lasangue ang 3rd Civil Relations Officer sa Central Command kinsa nitambong usab sa maong tigum nagkanayon nga gibantayan nila karon ang campus infiltrations sa mga rebeldeng NPA.
Diin maoy tinubdan sa mga edukado nga sa tan-aw sa mga rebelde mapuslan sa ilang kawsa sa mga umaabot nga katuigan.
Plano karon sa Central Command nga mohimo og seminars ug lectures sa nagkadaiyang mga tunghaan aron hisgutan ang mga pagpangilad ug pagpanggamit sa NPA sa mga tinun-an. – BANAT NEWS