CEBU - Walo ka pamilya sa sitio Tigib, barangay Lagtang, dakbayan sa Talisay ang pabakwiton gikan sa ilang gipuy-an tungod sa peligrong mausab sa pagdahili ang yuta diha sa ilang lugar.
Si Kapitan Celiapo Cabuenas sa pakighinabi niini sa Banat News mibutyag nga niadtong Biyernes sa kaadlawon midahili ang yuta diha sa lugar ug anha mihagsa sa panimalay ni Dominador Onabia ang mga dagkong bato apan swerte kay sementado ang maong balay ug wala mahugno.
Si Dr. Lino Alanzado sa Talisay Rescue Emergency Action Team (TREAT) matud ni Cabuenas ang mipahimangno nga ang mga residente sa lugar ang pabakwiton paglikay sa disgrasya tungod kay posibleng aduna pay laing pagdahili sa yuta tungod sa pag-uwan.
Gawas sa pamilyang Onabia lakip sa pabakwiton ang mga silingan niini nga mga pamilya nila ni Rodolfo Adala, Julius Jumao-as, Lolita Cancinco, Durano Caballero, magsuong Jocel ug Joshua Echavez ug Juan Echavez
Si Renato Cabradilla, kalihim sa Lagtang sa pakighinabi niini sa Banat News mibutyag dunay napulo ka adlaw nga tagal aron sila mobiya apan nangayo og kundisyones ang mga naapektahan sa pagpaningil og disturbance pay ug pasaligang makabalik sila og puyo diha sa lugar.
Si Cabradilla mibutyag usab nga sobra na sa duha ka buwan karon ang milabay diha gihapon sa maong lugar usa ka inahan ang namatay tungod kay ang ilang balay nadat-ogan og dakong bato nga miuban sa pagdahili sa yuta.
Ang maong inahan nagkugos sa iyang masuso apan naub-an niya kini ug naluwas apan siya namatay. – BANAT NEWS