CEBU - Gipasalig sa nasudnong kagamhanan nga tabangan ang tanang nabiktima ilabi na ang mga kabanay sa mga pasahero nga nakalas sa nalunod nga M/V Princess of the Stars.
Ang pasalig giluwatan ni Presidential Management Staff Chief Cerge Remonde, atol sa pagpakighinabi niini sa mga tigbalita kagahapong adlawa.
Matud ni Remonde nga siya gipadala sa presidente dinhi sa Sugbu aron sa pagsiguro nga mahatag sa mga hingtungdan ang mga gikinahanglan niini.
Ang kalihim gisuginlan sa mga opisyal sa siyudad ug sa ubang mga ahensya, labot sa ilang gihimo pagtabang sa kabanay nga nagpaabot sa mga biktima.
Nasayran nga ang Department of Social Welfare and Development (DSWD) mihatag na og financial assistance ngadto sa kagamhanan sa dakbayan.
Miingon si Remonde nga ang tabang sa nasudnong kagamhanan magpadayon samtang kini gikinahanglan ilabi na sa kabanay sa mga biktima.
Samtang gidayeg ug gipasalamatan usab sa kalihim ang kagamhanan sa dakbayan ug ang ubang ahensya sa kagamhanan nga mitabang sa kabanay ug sa mga biktima sa maong trahedya.
Lakip usab sa gipasalamatan ni Remonde mao mismo ang mga opisyal sa Sulpicio Lines nga giingong mihatag sa ilang aktibo nga kooperasyon.
Sa pikas bahin, gipadangat sa kalihim ang pahasubo sa Malakanyang ngadto sa kabanay sa mga biktima pagkalunod sa M/V Princess of the Stars.
“On behalf of the president, I would like to extend our most sincere condolences to the families of the victims…the national government will support the local government unit for everything that can be done in order to alleviate the situation, and again, we commend the government and the people of Cebu to get together in times of crisis,” miingon si Remonde.
Si Remonde mibisita kagahapon sa action center sa Cebu City Sports Complex ug mipahibalong dunay P1 milyon nga gihatag ang presidente alang sa pundo sa maintenance sa action center aron magamit sa mga kabanay sa mga biktima hangtud nga kini matapos. - Elly Bolonos ug Edwin Ian Melecio (BANAT NEWS)