Malacañang mibabag?

CEBU - Wala mahinayon ang gitakdang turnover of command kagahapong adlawa sa Cebu City Fire Department ug sa ubang Fire station sa probinsya sa Sugbu human makadawat og kamanduan ang rehiyunal nga buhatan sa Bureau of Fire Protection (BFP-7) gikan sa ilang uluhang buhatan nga iuktaba ang maong kalihukan.

Ang BFP Order REA-2008-142 nagmando kang BFP-7 Director Senior Superintendent Eleuterio Iturriaga nga ipadaplin lang una ang ipahigayong lahugay.

Kini samtang mopahigayon pa og dugang pagtuon ang BFP-Manila sa nahisgutang lakang partikular na sa liderato sa kabumberuhan sa dakbayan.

Una nang gipahibawo ni Mayor Tomas Osmeña nga iyang babagan ang bisan unsang lakang paghulip kang Cebu City Fire Marshall Superintendent Esmael Codilla.

Apan daw gituyo nga gitakda ang lahugay nga wala dinhi ang mayor sanglit tua kini sa Amerika.

Si Codilla gikataho nga i-promote unta sa pagka-assistant regional director sa BFP-7, samtang ang ihulip kaniya mao si Mandaue City Fire Marshall Chief Inspector Oscar Mayol.

Nasayran nga si Konsehal Sylvan Jakosalem maoy nanawag sa Malakanyang ug mihangyo nga pugngan una ang pagrelibo kang Codilla human pahibaw-ang natagbaw ang mayor sa performance ni Codilla ug dili gusto ang mayor nga mahulipan kini.

Gitataw hinuon ni Iturriaga nga magpabilin si Codilla sa iyang posisyon hangtud nga siya makadawat og laing kamanduan gikan sa ilang uluhang buhatan.

Kahinumduman nga si Codilla girilibuhan na kaniadto sa iyang posisyon, apan nahibalik ra usab sa katungdanan tungod sa pag-insister ni Mayor Osmeña.- BANAT NEWS