Padayong sungogon sa commanding general sa Central Command Lt. General Pedro Ike Inserto ang mga militanteng pundok nga sa sunod nilang rally diha sa Central Command dili na tukar sa Pasko ang ilang madungog kundili patukaran na niya og banda ug butangan og dagkong sound system.
Niadtong Lunes ang mga sakop sa Karapatan ug Bayan nilusad og protesta atubangan sa Centcom ug gikundenar nila ang padayong opensiba sa militar didto sa Negros ug nakaapekto na sa mga sibilyan.
Ang mga militante mipasangil nga mga inosente ang napatay ingon ug usa ka malinawong barangay ang gibombahan sa militar, mga pasangil nga gisalikway ni Inserto gumikan kay lehitimo ang operasyon ug di barangay sa mga sibilyan ang nahitaboan kundili awaaw ug kampo sa NPA.
Gikaengkwentro sa mga sakop sa 79th Infantry Battalion ang mga rebelde diha sa kabukiran sa Dauin, Negros Oriental sa miaging semana nga miresulta sa kamatayon sa tulo ka tawo lakip na ang usa ka nursing graduate nga si Rachelle Palang nga taga Consolacion.
Atol sa rally, nagdala og megaphone ang mga militante apan gibarikadahan sa mga sundalo ang gate og barbed wires nga gibantayan sa mga crowd dispersal team sa military police samtang dunay sound system nga gitugtugan og mga awit pamasko.
Gikatahong nangreklamo ang mga militante kay wala sila magdungog tungod sa kakusog sa gipatukar sa Central Command niadtong Lunes.
Sumala pa ni Inserto nga ang mga nangangkong progresibong pundok nga mga militante mga legal fronts sa NPA.