Pormal nang gihulipan ang Sector Commander sa Customs Police sa Customs Sub-Port of Mactan sa Mactan Cebu International Airport gumikan sa kalambigitan sa kontrobersiyal nga pagpabuhi sa barkong Philippine Dream.
Ang gihulipan mao si Capt. Benjamin Capacite, gibalhin ngadto sa ulohang buhatan sa Customs Police.
Si Capt. Capacite gihulipan ni Capt. Hernando Anonas Jr. ug naghawid kini sa posisyon nga Deputy District Commander ug concurrent Sector Commander sa Customs Police sa Customs Mactan.
Ang maong kamanduan gikan ni Bureau of Customs Commissioner Napoleon “Boy” Morales nga pinetsahan niadtong Sept. 4 ning bulana.
Si Anonas gikan sa Customs District Office sa Davao ug gihulipan siya ni Capt. Ronald Passion sa daan niining buhatan.
Matud pa ni Anonas nga hinungdan sa pagbalhin kang Capacite naggumikan sa kontrobersiyal nga pag-ikyas sa barkong “Philippine Dream” (usa ka floating casino) nga aduna pay bayranan nga buhis sa Customs og sa Bureau of Internal Revenue kon BIR.
Kahinumduman nga ang maong barko gigaid diha sa usa ka shipyard gumikan sa kadako sa bayranan sa buhis niini ngadto sa duha ka ahensiya.