Crew sa sound system gisuyaan gipusil-tipi

Gipusil patay ang crew sa usa ka sound system human kini giingong gisuyaan atol sa pagserbisyo niini sa gipahigayong disco didto sa Sitio Ulbohan, barangay Bonbon lungsod sa Aloguinsan niadtong Sabado sa alas 5:00 sa sayong buntag nunot sa kapistahan sa maong lugar.

Ang biktima nga gideklarar sa mga doktor sa Pinamungajan District Hospital giila lang kini sa pangan nga usa ka ‘Danny,’ helper sa sound system nga gigamit sa disco sa maong lugar ug lumad nga taga lungsod sa Liloan.

Subay sa inisyal nga imbestigasyon sa kapulisan gikan sa kauban sa biktima gituohan nga nasuyaan ang biktima tungod pagpakigpares og mga babaye sa maong lugar.

Sumala pa sa kauban sa biktima, usa ka lalaking nagsuot og camouflage nga karsones ug nagkalo nga pinatabon ang nawong ang niduol sa biktima ug nideretso pagpusil kaniya tulo ka higayon gamit ang wala pa matinong kalibre sa armas nianang alas 3:30 sa kaadlawon.

Gidali unta kini pagdala sa Pinamungajan District Hospital apan gideklarar kini nga dead on arrival human makaangkon og samad pinusilan sa iyang bukobuko ug sa bukton.