Naligsan sa 'hit & run' pigsat

CEBU - Napigsat-patay ang usa ka motorista, samtang angol ang duha niya ka backrider human kini hiligsi sa usa ka hit and run nga Toyota Innova didto sa dalan A.S. Fortuna sa barangay Banilad, dakbayan sa Mandaue niadtong Sabado sa gabii.

Ang namatay mao so Joel Cañete, 44, nga taga Lower Sampaguita sa barangay Banilad, ug ang mga naangol mao sila si Gelson Oteda, 23, nga taga Paradise, Looc, Mandaue City ug Jeffrey Bontilao nga taga Pung-ol sa lungsod sa Pinamungahan.

Si SPO2 Eleazar Saromines nga nahinabi sa Banat News miingon nga padulong sa Highway Seno ang motorsiklo nga gidala ni Cañete ug gidasmagan niini ang duha ka mga taxi nga Kia ug Toyota Corolla.

Ang Kia taxi gimaneho ni Paquito dela Rosa, samtang ang Toyota Corolla nga taxi gimaneho usab ni Luciano Gilbaro Pagap nga taga Dumanjug, Cebu.

Matud pa ni SPO2 Saromines, nga gumikan sa pagkadasmag ni Canete ngadto sa duha ka taxi, nalagpot kini uban sa iyang duha ka backrider .

Apan gidimalas si Cañete kay sa pagtugpa niini sa taliwala sa highway, nataymingan usab nga maoy paglabay sa nagbaguros nga Toyota Innova busa naligsan si Cañete.

Ang drayber sa Totoya Innova wala magpakabana sa iyang naligsan ug mipadayon ra kini sa pagpadagan sa iyang sakyanan ug maayo nalang kay nakuha ang plate number niini nga YEJ 655.

Dali nga gidala ang tulo ka mga biktima sa Mandaue City District Hospital apan si Cañete nga nakasinati og grabeng kadaut sa kalawasan gideklarar nga dead on arrival.

Si SPO2 Saromines miingon nga ilang gipangita ang wala hiilhing drayber sa Toyota hangtod karon aron makapanubag kini sa iyang sala. – BANAT NEWS