CEBU - Dul-an sa usa ka milyon ka pesos nga kantidad sa nagkadaiyang klase sa mahalong alahas ug dolyares ang nadala sa nag-inusarang kawatan human gisulod niini ang panimalay sa usa ka kawani sa gobiyerno kagahapon sa alas 4:00 sa kaadlawon diha sa Andres Abellana barangay Guadalupe ning dakbayan.
Si SPO1 Carlos Silacay sa Guadalupe Police Station nga gikahinabi sa Banat News nitug-an nga ang panimalay ni Socorro Grace Morgia, 40, maoy gisulod sa wala pa mailhing kawatan.
Matud pa ni SPO1 Silacay nakasulod ang kawatan sa master bedroom pinaagi sa pagguba sa sliding glass sa bintana hinungdan nga yano nalang kaayo kining nakasulod sa kuwarto ug gipanguha ang maong mga nagkada-iyang klase sa alas uban sa 4 mil nga Hongkong dollars, 200 Australian dollar, 200 Singaporean dollars, ug 2 mil nga Japanese yen.
Ang kawatan gikatahong yanong nigawas sa balay ug nigawas sa gate ug wala na niya makit-i.
Matud pang Morgia sa Banat News wala siya matulog sa maong lawak niadtong tungura kay gituparan niya ang iyang mga anak og katulog sa pikas lawak. – BANAT NEWS