DepEd awhagon pagklaro sa 'No Collection' policy niini
CEBU - Nireklamo na ang mga opisyal sa Parents-Teachers Community Association kon PTCA Federation sa siyudad sa Sugbu labot sa usa ka kamanduan nga giluwatan sa Department of Education (DepEd).
Partikular na niini ang DepEd Order Number 19 series of 2008 nga nagdili sa pagkolekta o bisan unsang amutan ngadto sa mga tinun-an nga nagdili sa pagkolekta og bisan unsang contributions gikan sa pre-school hangtud sa grade IV atol sa enrollment period.
Gitugutan lang ang pagkolekta og kontribusyon gikan sa grade V pataas, apan kini giingong dili usab pinugsanay ug kinahanglang boluntaryo lang.
Kini naglakip sa Girls ug Boys Scouts membership, Red Cross membership, Anti-TB Fund Drive, School Publication, Membership sa Student Organization ug PTCA.
Apan ang PTCA federation sa dakbayan nga gipanguluhan ni Konsehal Edwin Jagmoc nakahukom nga mopadala og suwat ngadto kang DepEd Secretary Jesli Lapus.
Kini ilang nahukman atol sa gipahigayon nga general assembly niadtong miaging Sabado aron sa pagpangayo og katin-awan ngadto sa kalihim.
Bisan tuod gidayeg sa mga opisyal sa PTCA Federation ang lakang ni Lapus apan sila nabalaka usab sa mamahimo unyang epekto sa DepEd Order Number 19.
Kini tungod kay ang ilang makolekta nga contributions giingong maoy gamiton alang sa pag-hire og guwardiya diha sa publikong mga tunghaan sa dakbayan.
Gawas niini, ang makolekta nga kuwarta mao usab ang kuhaan sa gahin alang sa janitorial services ug sa uban pang galastuhan sa tunghaan. Buot usab matino sa PTCA Federation officials kung ang lakang sa DepEd mao na ba ang sinugdanan pag-ban sa PTCA Homeroom Organization sa apektadong mga klase.
Samtang ang outgoing president sa Central Visayas PTCA Federation nga si Edgar Borces nipahibawo nga ilang sagupon ang suwat sa PTCA Federation sa siyudad.
Kini atol unya sa ilang regional general membership meeting nga gitakda karong umaabot nga Nobiyembre 22. – BANAT NEWS
- Latest
- Trending
