Cuenco andam mangayo og sorry

CEBU – Andam mangayo og pasaylo si Cebu City South District Congressman Antonio Cuenco ngadto kang Guadalupe barangay captain Jingjing Faelnar kung masuta sa kongresista nga walay iregularidad ang pagpatuman niini sa iyang P15 milyones nga agri-project.

Nasayran nga giuli na sa mga opisyal sa barangay Guadalupe ang sobra sa P15 milyones human pangitai ni Cuenco.

Ang kapin sa P7.6 milyones didto hinoon gi-turn-over sa mga barangay officials sa Department of Agriculture (DA-7).

Apan taliwa niini, buot sa kongresista nga susihon sa Commission on Audit (COA) ang pagpatuman sa proyekto kung wala bay iregularidad.

Nasayran nga ang napatuman lang sa nahisgutang programa mao ang pagpamalit ug pagpang-apod-apod sa mga seedling ngadto sa kabarangayan.

Wala na mapatuman ni Faelnar ang pagpamalit og pagpang-apod-apod sa mga kanding tungod kay gipapauli ni Cuenco ang wala magamit nga kwarta.

Apan gusto nga matino sa kongresista kung wala bay nahimo nga kalapasan si Faelnar sa iyang pagpang-apod-apod sa mga seedling human angkuna sa kapitan nga dunay mga barangay sa amihanang distrito sa siyudad nga iyang gipanghatagan usab niini.

Sa pikas bahin, gusto usab masuta ni Cuenco kung asa gipananom ang mga fruit bearing seedlings nga gituuhan niini nga namunga na niining panahuna.

Gipadayag sa kongresista nga kung matino sa COA nga tukma ang pag-implementar ni Faelnar sa iyang programa, siya andam mangayo niini og pasaylo. 

Una nang gipahibawo ni Faelnar nga wala siya mabalaka sa lakang ni Cuenco ug bisan na sa pag-apil sa Ombudsman Visayas sa pag-imbestigar niini tungod kay giingong makita ang mga seedling sa gitamnan niini

“Natural man lang na sa Ombudsman nga mohimo og imbestigasyon pero accounted man tong tanan, so wala gyud ko ana mabalaka,” sumala ni Faelnar. – BANAT NEWS