Riders sa motorsiklo higpitan og maayo

CEBU – Gipaabot nga mag-atubang og dagkong multa ang mga motorista nga dili mag- helmet ug dili magsul-ob og sinina ug sapatos sa panahong magmaneho kini og motorsiklo.

Kini nunot sa bag-ong direktiba sa Land Transportation Office (LTO) nga nagpugos sa tanang mga motorista pagsul-ob gyud og helmet ug sapot lakip na ang mga backriders sa motor.

Si LTO-7 Regional Director Raul Aguillus mibutyag sa Banat News nga may bag-ong direktiba nga iyang nadawat gikan sa Manila nga gipatas-an ang multa lakip niadtong makalapas sa mga balaod bahin sa pagpataka og parking sa motorsiklo diha sa mga sidewalk.

Ubos sa maong direktiba, gipatas-an ngadto sa P2,500 gikan sa P500 ang multa niadtong madakpan nga magpataka og parking sa ilang mga motorsiklo.

Gipasabot ni Aguillus nga gituyo kini aron gyud pag-obligar sa tanang mga motorista nga dili magpataka og parking ug mosunod gyud sa mga lagda sa trapiko.

Ang maong direktiba gitakdang ipatuman sa LTO-7 dinhi sa Central Visayas niining semanaha hinungdan nga gisabwag sa director kining maong direktiba ngadto sa publiko aron masayod ang tanan niini.

Nunot niini palig-onon usab sa LTO-7 ang pagpakatap sa ilang mga deputize agent nga magmonitor niadtong mga motorista nga makalapas sa lagda sa trapiko ilabina gyud katong mga motorsiklo nga walay klarong rehistro o kaha walay klarong lisensya ang drayber niini. – BANAT NEWS