CEBU - Usa ka Briton ang swerteng nakalingkawas sa tinong kamatayon human mahagbong ang iyang gimanehong awto sa gibana-banang 30 ka tiil nga gilawmon sa bung-aw diha sa barangay Bongoyan lungsod sa Borbon niadtong milabay'ng gabii.
Ang nahagbong mao si Richard Lewenson Gibson, 62, usa ka pensioner ug nagpuyo sa barangay Muabog, Tabogon, Cebu.
Si SPO2 Maximo Sanico nga gikahinabi sa Banat News nitug-an, si Gibson nagmaneho sa iyang Honda Jazz (plate number nawagtang) gikan sa dakbayan sa Sugbu.
Gikataho nga inay mopaingon sa iyang gipuy-an sa barangay Muabog nisubay kini sa laing barangay sa Bongoyan nga usa ka bukirong barangay sa Borbon nga may gilay-on nga 10 kilometros gikan sa Poblacion.
Matud pa niini nga wala masuhito ang maong Briton dihang kalit lang kining nisubay sa laing dalan ug nalahos ngadto sa bung-aw hinungdan nga maayong pagka-gusbat sa sakyanan.
Sumala pa niini nga dihang ilang gi-rescue ang maong Briton nakurat sila gumikan kay walay tatsa ang lawas niini bisan tuod kun duna silay nakitang dugo sa sinina niini. (BANAT NEWS)