Hayop idili sa dalan

Did-an na unya ang mga molupyo sa barangay Adlaon ning siyudad sa Sugbu pagtugway sa ilang kahayopan sa daplin sa karsada sa barangay.

Kini tungod usab sa pipila na ka mga disgrasya sa kadalanan nga naglambigit sa mga hayop nga magsuroy-suroy sa ilang sitio ug barangay road.

Ang nakapait sa maong mga hitabo tungod kay ang maaksidente pa nga mga motorista maoy pagastuhon ug pabayron sa danyos.

Alang sa mga opisyal sa barangay Adlaon nga kini dili makatarunganon, hinungdan nga ilang gipalabang ang usa ka Barangay Ordinance 09 nga nagbuot nga ang tag-iya na sa hayop maoy patubagon kung ang binuhi niini maoy hinungdan sa disgrasya.

Lakip na niini ang pagpatambal sa mga motorista nga makaangkon og kadaut sa kalawasan tungod sa mahitabong aksidente.

Sa samang higayon, dili na usab makapangayo og danyos ang tag-iya sa hayop ngadto sa driver o tag-iya sa sakyanan.

Labaw sa tanan, dili na makapaningil ang tag-iya kung unsay dangatan sa hayop niini nga makit-an sa bisan asang karsada diha sa barangay.

Ang nahisgutang ordinansa giaprobahan sa kinatibuk-ang sakop sa konseho nga gipangulohan ni kapitan Nieves Narra.

Kini gitun-an pa hinuon karon sa Committee on Laws sa konseho sa dakbayan kung wala bay babag ang pagpatuman sa maong ordinansa.

Kung masuta sa City Council nga walay nahasupak nga balaod sa nahisgutang ordinansa, kini mahimo nang ikapatuman sa barangay Adlaon.

Ang mga habal-habal o motorsiklo nga magbiyahian diha sa maong barangay maoy sagad makadasmag og hayop ug maaksidente sa kadalanan.