Nalumos sa lunangan

Usa ka 88 anyos nga tiguwang babaye kinsa gituohang nahagbong ug nalumos sa lunangan sa kabaw, napalgang patay na   didto sa Sitio Cristorey barangay Guadalupe siyudad sa Carcar niadtong Huwebes sa alas 12:30 sa udto.

Nailhan kini nga si Cristina Barrina, 88, byuda, nga taga sitio Cristorey.

Ang unang nakakita sa tiguwang mao ang iyang silingang mag-uuma nga si Ernesto Badangan, hingkod, kinsa mibutyag sa kapolisan nga nagkaob ang tiguwang nga naglutaw sa lunangan sa kabaw nga wala nay kinabuhi.

Si PO1 Renido Villaraiz sa Carcar City Police Station mibutyag sa Banat News nga si Badangan, kinsa gikan sa pagdaro, nagpalunang sa iyang kabaw didto sa usa ka lunangan nga nahimutang sa usa ka lupot niadtong higayona dihang pag-abot niya didto maoy iyang nakita ang tiguwang.

Bisan ang kapolisan may tiyorya nga malagmit ang maong tiguwang nga halap na ang panan-aw, nadagma kini samtang naglakaw tungod sa lunangan unya naligid ug pagtugpa niini sa lunangan   nga maoy hinungdan sa iyang hinanaling kamatayon.

Ang kapulisan sa siyudad sa Carcar misalikway sa mga pagduda nga may foul play ang kamatayon sa maong tiguwang.

Ang patay’ng lawas niini kasamtangang gipahiluna sa Tupas Funeral Homes sa Carcar City aron ma-autopsy.