Dugang experts ang mangabot

Dugang mga eksperto sa disaster victim identification gikan sa gawas sa nasud ang gikatakdang mangabot aron motabang sa pag-ila ug pagkuha og data sa mga maugkat unyang mga patay gikan sa barkong MV Princess of the Stars.

Kini maoy gipahibalo ni Dr. Renato Bautista, pangulo sa National Bureau of Investigation-Disaster Victim Identification team nga maoy nakig-alayon sa mga sakop sa International Police Incident Response Team (IRT) inabagan usab sa International Commission for Missing Persons (ICMP).

Karong Septiyembre 21 maoy ikatulong bulan gikan sa trahedya sa pagkalunod sa maong barko nga may sakay nga kapin ug kulang 800 ka pasahero ug tripulante diha sa kadagatan sa Romblon.

Gibana-banang 300 pa ka mga patay ug karon gituohang mga bukog nalang ang maugkat diha sa maong barko ug pinaagi sa dugang mga eksperto mas paspas pa ang pagkuha sa mga data sa mga patay alang na unya sa DNA matching ngadto sa Sarajevo, Bosnia.

“Experts in Pathology, Anthropology, Odontology, photography and DNA will come to Cebu City to hasten the processing of the cadavers,” sumala pang Bautista.

Ang maong mga eksperto ibutang diha sa examination line nga maoy agian sa mga patay subay sa Interpol standard operating procedures sa pag-ila sa mga wala mailhing mga patay’ng lawas.

Sa laing bahin gipasalig ni Nimal Mahagamage, team leader sa Interpol-IRT nga magpabilin sila dinhi sa Sugbu ug ilhon ang tanang patay’ng lawas nga maugkat aron mauli sila sa ilang mga mahal sa kinabuhi aron usab mahatagan og desenteng lubong.

“We renew our promise to stay until a sense of closure is brought to their families,” sumala pang Mahagamage kagahapon sa gihimong press conference.

Si Mahagamage mipadayag nga sa 314 ka mga patay’ng lawas nga miabot dinhi sa Sugbu ug nakuhaan na og mga DNA samples 122 niini ang natugyan na nila ngadto sa ilang tagsa-tagsa ka pamilya lakip na ang 40 ka mga lawas nga giila sa mga kabanay pinaagi sa ilang physical ug mga kabtangan nga nagtapot pa sa ilang kalawasan.

Giawhag usab ni Bautista ang mga kabanay sa mga biktima nga mopatim-aw sa ilang buhatan sa Cosmopolitan Funeral Homes nga maoy lugar diin ipahigayon ang pagkuha og DNA samples aron itandi sa mga DNA samples nga nakuha gikan sa mga biktima.