Giluba sa bayaw patay

Patay ang usa ka tawo human kini lubaa sa igsoon sa iyang kapuyo didto sa Sitio Banacod, barangay Lapurisima Conception siyudad sa Bogo niadtong Miyerkules sa alas 9:00 sa gabii.

Ang biktima mao si Edmir Mondares Malinao, hingkod, ulitawo, apan may gika-live-in nga si Simonette Singulan, hingkod ang panuigon.

Samtang ang suspek mao si Romeo Baryoga, hingkod, ulitawo ug lumad nga taga lungsod sa Daanbantayan, Cebu apan kasamtangang nagpuyo tipon sa biktima .

Si SPO4 Emmanuel Masong sa Bogo City Police Station mibutyag sa Banat News nga sa sayo pa nag-away ang biktima ug ang iyang kapuyo nga igsoon sa suspek kalabot sa personal nilang problema.

Apan ang suspek nga diha usab sa balay niadtong higayon, milaban sa iyang igsoon ug human makagunit og kutsilyo gikan sa kusina, gidasmagan dayon ang biktima ug gihansakan sa iyang kutsilyo.

Ang biktima nga samdan sa walang bahin sa dughan, gihatod dayon ngadto sa Verallo District Hospital sa siyudad sa Bogo apan gideklarar kining Dead on Arrival (DOA) sa mga doctor.

Matud ni SPO4 Masong nga nakasibat dayon ang biktima ug gituohan nila nga atua na kini karon sa laing lugar.

Hinuon giandam na ang tukmang kaso batok sa suspek.