5 piliang hepe sa MCPO

Lima nalang sa walo ka opisyal nga kwalipikadong modumala sa Mandaue City Police Office (MCPO) ang kapilian ni Mayor Jonas Cortes sa Mandaue City, matud pa ni P/Ssupt. Vicente Loot ang  Deputy Director for Personnel sa Police Regional Office-7.

 Si Ssupt. Loot nga nahinabi sa Banat News mibutyag nga ila nang gipadala ngadto sa Director for Promotion Division sa kampo Crame ang mga ngalan sa walo ka mga opisyal  lakip na ang ilang mga  records niini alang sa pag- evaluate kung kinsa kanila ang mas labaw nga kwalipikado sa pagdumala sa MCPO.

Apan sa walo ka mga ngalan nga ilang gisumiter, lima lamang ang pilian sa Kampo Crame ug mao usab kini ang ilang ihatag nga mga ngalan ngadto ni Mayor Cortes.

Kini human madawat sa PRO-7 ang suwat hangyo nga pahulipan na gyud si P/Ssupt. Rodel Calungsod sa pagdumala sa MCPO.

Nanghinaut lang si Loot nga mahiuyon si Mayor Cortes sa ilang ipadala nga mga ngalan ngadto sa iyang buhatan.

Nasayran sa Banat News nga tulo sa walo ka mga girekomendar ni Ssupt. Loot, nakaserbisyo na kanhi sa MCPO ug kini mao sila ni Ssupt. Alexander Abadinas ug Ssupt. Jesus Gaking isip kanhi MCPO Director ug si Ssupt. Edgardo Ingking isip usa sa mga kanhing division chief sa MCPO.

Samtang ang lima ka mga opisyal nga wala pa makaserbisyo sa MCPO ug kwalipikado gihapon sa maong posisyon mao sila ni P/Ssupt. Leodegario Acebedo, Ssupt. Melvin Buenafe, Ssupt. Teodoro Caranza, Ssupt. Carmelo Valmoria ug Ssupt. Louie Oppus

Matud pa ni Loot posibleng karong adlawa masayran na kung kinsa ang lima ka mga opisyal nga napilian sa mga kadagkuan sa kampo Crame.