Usa ka panday nga caretaker sa kanhi sakop sa Philippine Air Force nga miunay og pusil patay sa iyang ugangan ug bayaw pipila na ka bulan ang nakalabay ang gipauwanan sa mga bala ug namatay sayo kagahapon sa buntag diha sa dalan Lapulapu St., San Antonio Village barangay Apas ning dakbayan.
Ang namatay giila sa kapulisan nga si Michael Salandaga, 31, taga sitio Dagohoy, San Antonio Village sa nahisgutang barangay samtang duha ka mga lalaki nga nagsakay og motorsiklo maoy nipusil sa biktima.
Si Salandaga nakaangkon og samad pinusilan sa tuong bahin sa dughan namatay pipila ka gutlo sa usa ka pribadong tambalanan.
Sa imbestigasyon sa mga sakop sa Homicide Section padulong na mopauli sa ilang panimalay sa sitio Dagohoy ang biktima luwan sa iyang bisekleta dihang kalit lang ni-overtake ang duha ka mga lalaking luwan og motorsiklong kolor blue ug gipusil kini ug daling miikyas.
Si Sr. Supt. Patrocinio Comendador, director sa Cebu City Police Office mipadayag nga ila karong gitan-aw ang anggulong posibleng may kalambigitan ang pagpatay sa kasong giatubang sa agalon ni Salandaga nga si Master Sgt. Ernesto Burgarin.
Si Bugarin maoy nipusil patay sa iyang ugangan ug bayaw niadtong Mayor 30 gumikan sa panagbingkil tali sa ilang mga asawa apan wala hinuon siradohi ang imbestigasyon sa posibleng ubang anggulong makita sa kapolisan.