Nadugta na dihang nadiskubrehan ang patay’ng lawas sa usa ka Japanese national sulod sa lawak sa apartment nga iyang giabangan diha sa Poblacion Oriental sa lungsod sa Consolacion alas 11 pasado sa buntag kagahapon.
Ang maong langyaw giila ni Inspector Leoncio Baliguat Jr., hepe sa kapolisan sa maong lungsod nga mao si Hiromi Osato Suzuki, 59, minyo, ug kawani sa usa ka insurance firm sa Ayala Business Park sa dakbayan sa Sugbo ug nag-abang sa balay ni Gregoria Pilapil
Matud pa ni Pilapil nahibulong sila nga wala nay gawas-gawas si Suzuki sulod sa pipila ka adlaw ug alas 12:30 kagahapon sa udto nakatimaho na sila og langsa ug sama sa bahong karne gikan sa apartment niini hinungdan nga mitawag sila og pulis aron sa pagsusi sa maong lawak.
Si Inspector Baliguat mitug-an sa Banat News nga gikandadohan ang pultahan sa lawak hinungdan nga gipugos nila kini pag-abli ug napalgan ang patay’ng lawas sa maong langyaw nga nadugta na.
Dugang pa ni Inspector Baliguat nga dali nilang gikordon ang palibot sa maong dapit samtang nanguha og ebidensya ang grupo ni Inspector Oliver Lacosa sa Scene on Crime Operation (SOCO).
Matud pa niya nga sa ilang gihimong pakisusi sa mga silingan maoy ilang nasayran nga ang namatay nag-inusara lamang sa maong apartment nga gipanag-iya ni Pilapil sukad pa niadtong 2004.
Katapusan nga nasigpatang buhi si Suzuki niadtong miaging Domingo sa gabii nga nag-inusarang nanaug sa taxi ug midiretso og lahos sa apartment ug sukad niadto wala na sila makamatikod nga migawas kini.
Nagduda ang kapolisan nga posibleng giatake sa sakit ang biktima ug walay nakatabang kaniya.
Matud pa ni PO3 Jeromie Espinosa wala silay nakitang foul play sa kamatayon sa Hapones ug wala say nakitang timailhang gitulis kini sanglit hapsay ang kabtangan niini.
Si Pilapil nagkanayon nga adunay gihambing sakit nga hepatitis ug laing usa pa ka sakit ang Hapones.