Frats gipabantayan

CEBU - Hugot nga gipabantayan karon ni Senior Superintendent Rodel Calungsod kinsa maoy hepe sa Mandaue City Police Office (MCPO)ang mga batan-ong sakop sa fraternity aron mapakgang dayon ang mga binuang niini nga makadaot sa katilingban.

Gihimo ni Calungsod ang maong kamandoan human pabutha sa grupo sa mga batan-on ang usa ka ginama o improvized nga bomba niadtong miaging gabii.

Gumikan sa kasipa ug kakusog sa buto, nangagusbat ang bintana sa University of Cebu diha sa maong dakbayan.

Hinuon matud pa ni Calungsod nga mibahar ang kasong pinusilay nga naglambigit sa fraternity, gikan sa 22 ka kaso sa Enero ngadto sa Agosto 2007, ngadto na lamang sa 5 sa susama gihapong mga bulan sa tuig 2008.

Ang kawat ug pagpanulis maoy misaka og 13 porsiyento ning tuiga itandi sa susamang gidugayon sa miaging tuig.

Sayo niini puwerting pungota sa mga lokal nga opisyal sa gobyerno sa Mandaue kay maoy gipasanginlan ni Calungsod sa misakang krimen sa dakbayan.

Maoy hinungdan nga ginganlan ni Bise Mayor Carlo Fortuna ang kapolisan sa Mandaue nga walay alamag kay wala makasanta sa misakang kriminalidad sa dakbayan.

Alang kang Fortuna nga dili ang ilang kaguliyang diha sa konseho maoy angayang pasanginlan, kundili ang kakuwang sa hustong paagi sa kapolisan sa pagpugong sa krimen maoy angayang basulon.  (BANAT)