Puya gibasura

CEBU - Usa ka puya nga may pito ngadto na sa walo ka bulan ang pangidaron napalgan sa basurero sa may C. Padilla St., barangay Duljo ning dakbayan kagahapon sa alas 6:45 sa buntag.

Ang basurerong nakakita sa maong puya mao si Rogelio Sermillon, hingkod, nga taga Duljo.

Matud pa ni Sermillon nga gisulod og plastic sa biskuwit ang maong puya nga gilabay sa basurahan.

Si Sermillon mitug-an sa mga imbestigador nga samtang nangolikta siyag basura, nakita niya ang usa ka plastik nga may sulod nga maorag karne, busa wala niya kini iitsa og dayon ngadto sa trak sa basura.

Apan dihang iya kining giablehan, nakurat siya pagtan-aw niya nga usa diay kini ka gamay'ng bata nga hinilog gikan sa tiyan sa inahan.

Hinungdan nga gi-report dayon niya kini ngadto sa mga opisyal sa barangay kinsa mao nay nanawag sa kapulisan.

Ang maong fetus tua na karon sa usa ka punerarya ning dakbayan.  (BANAT)