Gipinute dughan nababha

CEBU - Nababha ang dughan sa usa ka foreman sa konstraksyon human kini tigbasa og pinute sa iyang bayaw didto sa barangay Sacsac lungsod sa Pinamungajan niadtong Lunes sa alas 4:30 sa hapon.

Ang biktima mao si Rolando Delantes, 54, minyo, foreman sa konstraksyon nga taga sitio Sta. Cruz sa nahisgutang barangay, samtang ang suspek mao si Danilo Gabutero, 51, biyudo, usa ka construction worker, nga bayaw ug silingan ra sa biktima.

Si SPO1 Nonilon Estonilo sa Pinamungajan Police Station mibutyag sa Banat News sa sayo pa nga nag-inom ang biktima ug suspek sa usa ka waiting shed duol sa usa ka videokihan sa nahisgutang lugar.

Matud pa ni SPO1 Estonilo samtang nangalasbag na ang duha, nagpunay kini og sayaw-sayaw duyog sa sonata sa videokihan.

Apan human sa pipila ka gutlo naglalis na ang duha hangtod nga mitaas na ang tingog nila sa pagsininghagay .

Ang maong away misangko sa pagpanigbas sa suspetsado ngadto sa biktima hinungdan nga nababha ang walang dughan sa naulahi.

Ang suspetsado kinsa mitahan ngadto sa kapolisan mibutyag nga gisigihan siyag hagit sa biktima sa sayo pa, unya gipusposan pa og kahoy ang iyang kamot.

Dihang wala na siya kaantos, gilanit niya gikan sa sakuban ang iyang gitangkil nga pinute ug sa walay langan-langan, gihabas dayon niya ang biktima ug nasabak ang dughan niini.

 Ang biktima daling gihatod ngadto sa Pinamungajan District Hospital sa mga silingan apan gipadala kini ngadto sa Vicente Sotto Memorial Medical Center (VSMMC) sa dakbayan sa Sugbo aron pagsiguro nga dili mapildi ang iyang kinabuhi.

Ang asawa sa biktima kinsa igsoon ra usab sa suspek desidido nga mopasaka og kaso batok sa suspetsado nga iyang igsoon. (BANAT)