'World class' CCPO tukuron

CEBU - Pang ‘world class’ na unya ang buhatan sa Cebu City Police Office kini kun matinuod ang pagtukod og bag-ong estruktura niini diha sa Camp Sotero Cabahug.

Kini maoy gibutyag ni PRO-7 Chief Ronald Roderos kagahapong adlawa atol sa pagduaw ni PNP-Director Avelino Razon Jr. kinsa dinhi sa dakbayan sa Sugbu nga nitambong sa gipahigayong 133rd Regular Meeting sa National Law Enforcement Coordinating Council (NALECC) ug 26th Anniversary.

Matud pa ni Roderos nga ang PNP adunay gigahin nga P16.8 million   alang niini nga kabahin sa ilang P10 billion   budget sa lima ka tuig sa PNP Modernization Program.

Gipaabot nga sa dili pa moretiro si Razon sa iyang katungdanan karong petsa 29 ning bulan sa Septembre mapirmahan niini ang pagtugot niini sa paggawas sa pundo.

Giklaro niini nga adunay pipila ka mga national support units unya diha sa Camp Sotero ang ibalhin og laing lugar gawas sa medical ug health center magpadayon kini.

Iyang giklaro nga ang entrance unya niini adto na unya sa luyong bahin sa Camp Sotero Cabahug gumikan kay sa karaang entrance dunay nakababag nga luna nga gipanag-iya sa pribadong tawo nga padayon pa karong gi-claim.

Samtang ang kagamhanan sa dakbayan sa Sugbu ang nipasalig usab sa pag-abag og P5 milyones alang sa maong edipisyo base sa gipahibalo ni Konsehal Agusto “Jun” Pe Jr. kinsa tsirman sa committee on police ngadto mismo ni PNP Chief Razon human gisugo ni Mayor Tomas Osmeña. (BANAT)