Seedling project ni Faelnar 'masangit'

CEBU - Dako ang pagtoo ni Quiot barangay captain Vicente Ramos Jr., nga di tugutan sa Commission on Audit (COA) ang pagpang-apod-apod og mga seedlings ni Guadalupe barangay captain ug ABC president Jingjing Faelnar.

Kini human angkuna ni Faelnar nga lakip sa gihatagan niini mao ang mga barangay sa amihanang distrito sa siyudad.

Matud ni Ramos nga nalatid sa Special Allocation Release Order (SARO) nga ang P15 milyones nga gahin alang ra sa habagatang distrito sa dakbayan.

Ang maong kantidad gitumong alang sa pagpang-apod-apod og mga seedling ingon man sa hybrid nga mga kanding ngadto sa kabarangayan.

Nagkanayon si Ramos anaa na kang Faelnar kung unsaon niini pag-justify ang iyang gihimo aron kini dili ma-disallow sa COA.

“Problema na kana niya unsaon na pag-justify kay ang instruction ana sa SARO nga para ra gyud na sa south district,” sumala ni Ramos.

Nasayran nga ang kapitan maoy gisangunan ni Cuenco nga motiwas pagpatuman sa maong programa gikan kang Faelnar.

Kini human usab niaslom ang relasyon nilang Cuenco ug Faelnar sulod na sa pipila ka mga semana, apan sa report sa TV Patrol Sentral Visayas niadtong milabay’ng adlaw, si Faelnar mipadayag makig-uliay sa buot ngadto kang Cuenco.

Gipakagamay lang hinoon ni Faelnar ang opinyon ni Ramos tungod kay siya giingong nangunsulta nang daan sa wala pa mohatag sa mga seedlings.

Matud ni Faelnar nga ubay-ubay nga mga Non-Governmental Organization (NGO) ang nangayo kaniya sa mga seedlings apan kini giingong dili niya mahimo.

Kini ang hinungdan nga gipaagi ni Faelnar sa kabarangayan ang pagpang-apod-apod niini aron mao na usab ang motugyan sa mga seedlings ngadto sa NGO.

Gitataw sa ABC president nga makita na ang resulta sa gipananom nga mga seedlings tungod kay ang uban niini giingong anaa gitanom daplin sa kasapaan.

Gipadayag hinuon ni Faelnar nga kung i-disallow sa COA ang iyang gihimong lakang, kini dili niya igsapayan.

“Ug i-disallow man ugaling na sa COA for as long as nihatag ta og kaayuhan sa ubang mga tawo, bahala na lang sab uy,” nagkanayon si Faelnar. – BANAT NEWS