CEBU - Laing kasong sibil ang giduso ngadto sa Ombudsman Visayas batok sa mayor sa dakbayan sa Talisay sa usa ka tag-iya og luna diha sa barangay Lagtang, dakbayan sa Talisay.
Si Vivencio “Boy” Gabison ang miduso og reklamo niadtong Hunyo 13, 2008 sa buhatan sa Ombudsman kabahin sa iyang yangongo nga paabangon ang kagamhanan sa Talisay sa iyang lote nga dunay gilapdon nga 41 metro kwadrado nga nalakip sa karsada diha sa sitio Ilang-ilang sa barangay Lagtang.
Matud ni Gabison nga ang maong luna gigamit nga karsada sukad pa niadtong tuig 1971 apan hangtud karon wala siya bayri sa kagamhanan sa Talisay sulod sa 36 ka tuig.
Gawas niini si Gabison ang mangayo usab og bayad sa iyang duha ka parselang luna nga dunay gilapdon nga 152 ug 111 metro kwadrado diin nagamit usab kini sa siyudad.
Gawas sa Ombudsman si Gabison ang mipadala usab og kopya sa iyang reklamo ngadto kang Kongresista Eduardo Gullas.
Apan si Atty. Owen Algoso ang city legal officer sa dakbayan sa Talisay sa pakighinabi niini sa Banat News kagahapon sa hapon nagkanayon nga ang 41 metro kwadrado nga luna ni Gabison ang gi-expropriate sa Metropolitan Cebu Water District (MCWD).
Ug gani ang karsada nga nalakip ang lote ni Gabison ang MCWD ang sinugdanan nga nabuhat kini tungod sa ilang reservoir nga nahimutang sa ibabaw nga bahin sa lugar.
Si Algoso midugang nga tubagon nila ang ulahing reklamo ni Gabison. – BANAT NEWS