Revamp sa LCPO gihimo
CEBU - Usa ka dakong lahugay ang gihimo diha sa Lapulapu City Police Office sa director niini nga si Sr. Supt. Mariano Natuel Jr. nga gilangkuban sa mga opisyal ug mga police non-commission officer sa milabay’ng adlaw.
Ang maong lahugay gibase sa usa ka memorandum circular sa National Police Commission nga tanang mga ranking officials kinahanglan nga modala sa mga special units ug division sa PNP walay labot niini ang ilang tagsatagsa ka mga performance.
Apan gumikan sa kakulangan sa ilang mga dagkong opisyal sa kapolisan sa Lapulapu tanan niyang mga opisyal sa matag police station iyang gidestino sa mga special units ug ang mihulip kanila sa lima ka presinto gidumala lang sa mga PNCO nga nagranggo og SPO4 ug SPO3.
Sa kamandoan ni Natuel niadtong Sept. 16 si Sr. Insp. Rene Catamora sa Station 3 gibalhin ngadto sa Crime Against Property (kun kanhi TRS) isip hepe; Sr.Insp. Felix Pacaldo kanhi hepe sa Station 5 mao nay mangulo sa Police Community Relation kon PCR ug si Insp. Damiano Montebon kanhi hepe sa Station 4 mao nay hepe karon sa Investigation and Detection Management Section kon IDMS.
Samtang ang mga sub-stations, pangulohan ang Station 2 ni SPO4 Samuel Salimbangon, sa Station 3 mao si SPO4 Bonifacio Sumalinog, station 4 mao si SPO3 Gaspar Magdadaro ug sa station 5 ang hepe mao si SPO4 Danny Tampus.
Kagahapon sa buntag pormal na nga milingkod sa ilang tagsatagsa ka katungdanan samtang bugtong mensahe ni Natuel ngadto sa mga bag-ong naghupot og posisyon mao ang kanunay nga pagmonitor sa ilang tagsatagsa ka mga areas of concern aron malikayan ang pagtaas sa krimen ug illegal nga kalihukan sa ilang hurisdiksiyon. – BANAT NEWS
- Latest
- Trending
