2 patay sa dunggab ug dasmag

CEBU - Duha ka tawo ang nahiagom sa hinanaling kamatayon gumikan sa pagpanunggab ug disgrasya sa sakyanan sa managlahing lugar sa lungsod sa Cordova niadtong Lunes sa gabii.

Ang mga biktima mao sila si Andriano Gentapa, 37, minyo, taga sitio Socoro, barangay Dapitan, lungsod sa Cordova ug usa ka drayber sa traysikad nga gidunggab patay nianang alas 8:30 sa kagabhion ug si Simplicio Casilac, 67, ulitawo, taga barangay Alegria lungsod gihapon sa Cordova kinsa nadasmagan-patay usab nianang pagka-alas 10:30 sa gabii.

Si SPO3 Rafael Tero sa Cordova Police mibutyag sa Banat News nga si Gentapa gitusaktusak sa kutsilyo ni Randy Casul, 32, minyo, taga barangay Pilipog, Cordova, samtang si Casilac, gidasmagan sa usa ka delivery van nga gimaneho ni Rolan Endricoso, taga Seabreeze, barangay Mactan, Lapu-lapu City.

Si Casul mitahan dayon sa kapolisan samtang si Endricoso, misibat sa makadiyot apan nadakpan sa kapolisan ug karon nagtingkagol na ang duha ka mga suspetsado sa prisohan sa Cordova ug gipasaka dayon ang tukmang kaso batok sa usag-usa kanila. (BANAT)