CEBU - Boluntaryong nitahan sa iyang kaugalingon ang usa sa duha ka mga suspek sa pagpusil-patay sa usa ka sakop sa Lupon ng Tagapamayapa sa barangay Granada lungsod sa Boljoon niadtong Domingo sa gabii.
Ang nitahan sa kapulisan sa lungsod sa Alcoy niadtong Lunes sa alas 2:45 sa hapon mao si Reynaldo Delos Santos Cartalla, lumad nga taga lungsod sa Alcoy.
Ang deputy chief sa kapulisan sa Alcoy nga si SPO1 Primitivo Carunggay maoy personal nga ni-turn-over sa suspek ngadto sa kapulisan sa lungsod sa Boljoon.
Matud ni SPO4 Cristino Uraca ang OIC chief sa Boljoon Police dihang nahinabi sa Banat News si Cartalla maoy kauban sa laing suspek nga si Boy Racaza nga nipusil patay sa biktima nga si Samuel Bruce, 71, alas 10:30 sa gabii sa Boljoon.
Kini human sila gibadlong sa biktima tungod sa ilang kabanha samtang nag-inom sa usa ka tindahan niadtong tungura.
Hinoon matud ni SPO4 Uraca nga nakadawat sila og impormasyon nga nakasibat na didto sa Dumaguete City ang laing suspek nga si Racaza.
Matud ni SPO4 Uraca si Racaza maoy trigger man kon nipusil patay sa biktima samtang si Cartalla maoy nagsige og hagit og sukmagay sa biktima pipila ka gutlo sa wala pa mahitabo ang krimen.
Karung buntag ipasaka na sa kapulisan ang kasong murder batuk kang Racaza ug Cartalla. – BANAT NEWS