CEBU - Aron mabalik ang pagsalig sa mga tawo sa militar ug kapolisan sunod-sunod nga mga Civil Military Operations ang gilusad dinhi sa Cebu ug Metro Cebu .
Mipasabot ang kadagkoan sa militar nga dili lang military actions kundili apil usab ang ‘soft approach’ sa pagsulbad sa insurhensya pinaagi sa pagpahigayon og nagkalain-laing kalihukan nga walay kalambigitan sa gubat.
Si Major Rogelio Mesias, Task Group Commander sa Joint Civil Military Group Cebu atol sa press conference kagahapon sa Central Command mibutyag nga may lima ka task groups ang gi-deploy sa nagkadaiyang barangay sa dakbayan sa Sugbu, Mandaue ug Lapulapu City nga gikan sa Philippine Army, Philippine Air Force, Naval Forces Central ug Regional Mobile Group (RMG)-7.
Ang maong mga civil military operations gihimo diha sa barangay Guizo, Mandaue City; barangay Basak, Lapulapu City; barangay Canjulao sa samang dakbayan; sitio San Roque barangay Bonbon sa lungsod sa Aloguinsan.
Ang CMO-Cebu nipahigayon og feeding program nga gisuportahan sa Kiwanis Club nga nagsugod niadtong Agosto 21 niining tuiga, pagpang apod-apod og NFA rice sa sobra usa ka libo ka mga residente diha sa barangay Basak, Lapulapu City ug pagpahigayon og medical mission.
Matud ni Mesias ang gihimo karun sa militar ug kapolisan nakakuha og suporta gikan sa publiko ug local officials.
Apan matud ni Lt. General Pedro Ike Inserto, Commanding officer sa Central Command ang maong mga lugar gihulagway niini nga depressed area ug kini maoy usa sa mga tinubdan sa mga rebelde ug mga recruits nga magsugod sa pagdani kanila pagkuyog sa mga rallies. – BANAT NEWS