Perigo gihulipan sa Talisay
CEBU - Gihulipan na sugod kagahapong adlawa ang hepe sa Talisay City Police Station nga si Supt. Romeo Perigo human sa pipila ka adlaw nga pag-leave of absence niini atol sa pagronda sa panimalay sa kontrobersyal nga anak sa mayor nga si Joavan Fernandez.
“Supt. Romeo Perigo has been relieved effective today September 16 and he is assign in Provincial Headquarters, Sr. Insp. Jovito Canlapan is still Officer in Charge (OIC) in Talisay,” sumala pang Sr. Supt. Carmelo Valmoria, director sa Provincial Police Office.
“He (Perigo) occupy a position here in Provincial Headquarters with corresponding rank,” dugang pa niya.
Matud ni Valmoria si deputy ni Perigo nga si Sr. Insp. Jovito Canlapan mao lang una ang OIC sa Talisay Police Station samtang mamili pa sa lima ka pangalan sa mga posibleng mohulip kang Perigo si Mayor Socrates Fernandez.
Gihimakak ni Valmoria ang pagpalagpot kang Perigo may labot sa kontrobersya sa anak sa mayor kundili bag-o kining polisiya sa National Police Commission (Napolcom) circular no. 2008-004.
Base sa memorandum kinahanglan ang deputy sa provincial director pulos nagranggo og superintendent.
Giklaro ni Valmoria nga di lang si Perigo ang gipahulipan sanglit lakip si Supt. Larson Dechino sa Danao ug Supt. Renato Malazarte sa dakbayan sa Naga naapil niini. – BANAT NEWS
- Latest
- Trending
