Cuenco Desidido buwagon ang Banawa - Englis

CEBU - Gidasunan ni Cebu City DILG director Patricio Gabuya ang pamahayag ni Rep. Antonio Cuenco labot sa plano niining pagbahin sa barangay Guadalupe.

Si Cuenco nagtoo nga mas dali ang pagbuwag sa Banawa ug Englis gikan sa maong barangay kung kini ipaagi og ordinansa sa konseho sa dakbayan.

Gikatakdang makigkita si Cuenco sa mga sakop sa konseho aron banhawon ang ordinansang gipanday sa konseho niadtong 1996 niaprubar sa City Ordinance 1661 nga magbuwag sa nahisgutang duha ka sitio gikan sa barangay Guadalupe.

Ang maong ordinansa gipangamahan nila ni kanhi Konsehal Ronald Cuenco (anak ni kongresista Cuenco) ug kanhi Konsehal ug karon Bise Mayor Michael Rama.

Apan wala mapatuman ang maong ordinansa tungod kay walay napahigayon nga plebisito.

Niadtong tuig 2000 napasar na usab sa City Council ang Amendatory Ordinance 1817 nga alang gihapon sa maong katuyoan pinaagi sa paghingusog ni Konsehal Ronald Cuenco ug gisegundahan ni kanhi konsehal Jocelyn Pesquera.

Apan sa wala matinong hinungdan, wala gihapon mahinayon ang pagpahigayon og plebisito nga gitakda unta niadtong Mayo 6, 2000.

Matod ni Gabuya nga kinahanglan na usab nga maamendar ang nahisgutang ordinansa aron itakda na usab ang pagpahigayon og plebisito.

“Wa man nila maaksyuni, procedural man gud ning paghimo og barangay, naa gyud nay timetable, nawagtang na to ilang time plan,” sumala ni Gabuya.

Nasayran gikan sa napanday nga ordinansa nga nalatid na ang territorial boundaries tali sa Guadalupe ug ang hulmahon nga Barangay Banawa-Englis.

Gikataho nga kung dili mopabor ang mga sakop sa City Council sa tinguha ni Cuenco, determinado gihapon kining mopalabang og balaudnon sa Ubos Balay Balauranan kabahin niini. – BANAT NEWS