Taga Talisay di na magtraysikol

CEBU – Ang pagtaas sa plitehan sa mga traysikol sa Talisay City nakapaaghat sa mga molupyo sa paggamit nalang og biseklita o kaha maglakaw sa karsada ilabi na kun wala sila'y bug-at nga karga.

Si Raymundo Reyes usa sa mga drayber sa traysikol sa barangay Tabunok, mibutyag nga gibati sila'g kalaay kay imbes mudako na ang ilang kinitaan kay tag P8 na ang ilang singil sa pasahe, mikupos na hinuon kay daghan na kaayong mga pasahero nga dili na manakay og traysikol.

Usahay, magnihit gani ang mga pasahero, maglisod ang mga drayber sa pagbayad sa ilang abangan, matud pa ni Reyes.

Gikonpirmar usab kini ni PO3 Elmer Saladas sa Talisay Traffic Department kinsa nagkanayon nga magnihit gani ang pasahero “maglangoy” usab ang mga traysikol sa karsada.

Gumikan niini masugamak ang mga drayber sa kaalakanse bisan pa kun nagkakubos ang presyo sa gasolina.

Matud pa ni PO3 Saladas nga may 4,000 kapin ka unit sa traysikol nga nagbiyahian sa nagkalainlaing barangay sa Talisay diin ang pinakasentro sa ilang pamasaheroan mao ang merkado sa Tabunok ug mga eskuylahan.

Anha diha paingon o kaha manukad ang mga pasahero matag adlaw nga maoy nahimong panginabuhian sa mga drayber sa tuloy ligid nga sakyanan.

Apan niining pagsaka sa plitehan gibatig kahingawa ang ubang mga pasahero sa paggasto sa ilang P8, nga imbes ibayad sa traysikol ipalit nalang og makaon aron mabusog sila samtang magpatidpatid og lata sa karsada paingon sa ilang padulngan. – BANAT NEWS