6-anyos nalatayan sa multicab

CEBU – Napiyapi ang dughan ug nabuak ang apapangig sa 6-anyos nga batang lalaki nga tinun-an sa kindergarten nga aksidenteng nabanggaan og multicab ug nalatayan sa ligid atol sa iyang pagtabok sa karsada diha sa sitio Guilaguila barangay Bagalnga lungsod sa Compostela alas 10:30 niadtong Miyerkules sa buntag.

Ang biktima mao si Rianje Bangalando Noya, 6-anyos tinun-an sa Bagalnga Elementary School sa nahisgutang lungsod.

Samtang ang drayber sa multicab nga dunay plaka nga YDP907 nga maoy nakaligis kaniya mao si Carlito Laag Bugtai, 58, ug molupyo sa barangay Mulao Campos sakop sa maong lungsod.

Matud ni SPO1 Celas Ceballo sa traffic section sa Compostela Police dihang nahinabi sa Banat News gikan nga nigawas sa klase ang biktima ug paingon na unta kining mopauli kauban sa laing mga bata apan nagduwa-duwa sa karsada.

Ang drayber sa multicab nga si Carlito nitug-an atol sa pagsukit-sukit sa kapulisan nga sa layo pa ang distansiya nakabantay na siya sa unahan sa mga bata nga naginukdanay.

Apan dihang duol na siya wala niya mabantayi nga kalit nga nilabang sa karsada ang biktima nga si Rianje.

Atrasawo na nga maka-apply og break ang maong sakyanan ug nabanggaan ang biktima ug naparok ang nawong niini sa dulong una pa matumba.

Napasok ang bata sa ilawom ug nalatayan pa ang dughan niini sa kinauwahi-ang ligid.

Gisuwayan pa unta pagdala sa maong drayber sa Danao District Hospital ang biktima apan gideklarar kini nga dead on arrival sa doctor nga si Jose Maglasang.

Samtang ang drayber sa multicab boluntaryong mitahan sa iyang kaugalingon sa kapulisan ug nagpaabot sa tukmang kaso nga ipasaka batuk kaniya. – BANAT NEWS